心意（客）

蹛莊下，逐個有物件會相分食，這幾日有人送油菜、冬瓜、西瓜、韮菜、薍薺 、高麗菜。

送高麗菜个人有跈細子，我送一盒餅和蠟筆得細子。##ReadMore##

高麗菜有五粒，較緊送得三個屋邊，一儕一粒。

昨日晨早去泅水，泅水个朋友送佢自家作个醃瓜醬得我。

人作垺若係鋸鋸子，有來有去，按正會心適。

昨晚送貨員送一箱農場寄來个物件，打開係甜柿，真紅、真大粒，眏起來真好食。

內底有一張農場感謝个紙，講佢人个水果無噴生長激素、賀爾蒙、催紅素、殺草劑。

毋過無寫麼儕買送个，第一下我即想這係後生買个。

佢一個外月無轉，應該係用網路訂貨，農場直接寄來屋下。

下晝，後生開車轉來，問甜柿係佢買个麼，無毋著，和我想个共款。

人佇講頭親个人心會連心，後生係我降个，一兜仔攏毋假。