詔安客電視錄影（客）

客家電視台作詔安客節目～村民大會，佇鄉公所頭前坪錄影，人真多、真鬧熱。##ReadMore##

較多歲、會講客事个人，得人請出來講事，有人講著真順，有个人會雜一半句河洛。逐儕若擱毋

講客，客事即會無了了。

接落來即係客家藝術表演，有弄獅、布袋戲、布雞拳、童謠吟唱，攏用細子表演。

客家个開嘴獅，和一般弄獅个獅子無共款，細子弄起來真有範，獅嘴慢慢舐尾，真心適，逐個人

攏眏到嘴笑鼻齦。

這嘛電視个霹靂布袋戲，時行弄大身尪。晚夜這陣細子弄个係細身尪，無論比手、擎腳、講事、

行路，攏弄得真順範、有派頭，真無簡單。

布雞拳係成過个人練拳頭來打賊个，這兜細子佇打拳，轉過來斡過去，腳手真好，真齊、真好眏

。有一個細子細漢又矮，衫長到掩過短褲，毋過打拳毋輸人，真得人惜。

童謠吟唱，細子人幼聲幼舌，用詔安客唱歌，真和、真好聽，真多人打掌。

這擺錄影，即討發揚詔安客，毋過主持人係講四縣客，感覺真無合。詔安客人和河洛人蹛作垺，

慢慢佇河洛人同化，真多客事个音無正。這嘛電視作詔安客節目，主持人講四縣客；認證个書嘛

係照四縣客編个，唸起來毋順，擱按落去，詔安客有一日即會變作『奧客』。這係詔安客人頭愛

擘心个事。（本次錄影，客家電視台11/28首播11/30重播）